• Mataimakin Shugaban Ƙasa ya buƙaci ‘yan Arewa su haɗa kai domin sake zaɓen Tinubu a 2027, yayin da A4A ta tabbatar da goyon bayanta ga takarar
Mataimakin Shugaban Ƙasa, Sanata Kashim Shettima, ya bayyana cewa babu wani dalilin da zai sa Arewa ta ji tsoron sake zaɓen Shugaba Bola Ahmed Tinubu a karo na biyu, yana mai cewa yankin ya amfana sosai da gwamnatinsa, kuma akwai sauran alherin da zai samu idan aka sake zaɓenta a zaɓen 2027.
Shettima ya bayyana hakan ne ranar Litinin, 12 ga Oktoba, 2026, lokacin da ya karɓi tawagar ƙungiyar Arewa for Asiwaju (A4A), wata cibiya da ke aiki domin ganin an sake zaɓen Shugaba Tinubu a wa’adi na biyu, a ziyarar ban-girma da ta kai masa fadar shugaban ƙasa da ke Abuja.
Ya yi kira ga shugabanni da al’ummar Arewa da su haɗa kai su zama tsintsiya madaurinki ɗaya wajen neman ci gaban yankin da inganta rayuwar al’ummarsa, yana mai cewa waɗannan na daga cikin manyan abubuwan da gwamnatin Tinubu ta sa a gaba.
A cewarsa, Arewa ta samu wakilci da dama a muƙaman gwamnati, tare da ayyukan raya ƙasa da shirye-shiryen da suka shafi tattalin arziƙi da jin daɗin jama’a.
Mataimakin Shugaban Ƙasar ya ce: “Mu haɗa kai a matsayin al’umma, mu yi aiki domin ci gaban yankinmu da ci gaban jama’armu ta hanyar sake zaɓen wannan gwamnati. Muna amfana, kuma muna da damar ci gaba da amfana da wannan gwamnati ta hanyoyi da dama.
“Bankin Noma ya bayar da lamunin Naira biliyan 450 ga manoma ƙanana 700,000 a Najeriya, kuma kusan kashi 70 cikin 100 na waɗanda suka amfana ‘yan Arewa ne.
“Gwamnatin yanzu tana ƙoƙarin kammala manyan ayyukan raya ƙasa a sassa daban-daban na ƙasar nan. Ina tabbatar muku cewa Shugaban Ƙasa yana ƙaunar Arewa, kuma zai yi aiki domin Arewa.”
Shettima ya gode wa shugabannin A4A bisa goyon bayan da suke bai wa Shugaba Tinubu, sannan ya buƙace su da su ƙara himma wajen wayar da kan jama’a da tattara goyon baya a matakin ƙananan hukumomi, mazabu da al’ummomi daban-daban a faɗin Arewa.
Darakta-Janar na A4A, tsohon Gwamnan Jihar Jigawa, Malam Abubakar Badaru, ya bayyana cewa ƙungiyar ba za ta yi ƙasa a gwiwa ba har sai ta cimma burinta na ganin Arewa ta taka rawar gani wajen sake zaɓen Shugaba Tinubu a 2027.
Read also: Gov. Radda Assures Traders of Support
Badaru ya ce ƙungiyar na shirin tattaunawa da shugabannin addinai, ciki har da malaman Musulunci da na Kiristanci, da sauran fitattun ‘yan Najeriya domin bayyana musu dalilan da suka sa take ganin ya dace a sake zaɓen tikitin Tinubu da Shettima.
Ya ce: “Dangane da tattaunawa da manyan mutane, mun yi nisa sosai. Mun sha ganawa da su, kuma kwamitin amintattu zai sake ganawa da su domin ƙarfafa nasarorin da muka samu da kuma bayyana dalilin da ya sa ya kamata a goyi bayan wannan tikiti.
“Muna kuma tallafa wa Kwamitin Yaƙin Neman Zaɓen Shugaban Ƙasa (PCC) a dukkan ƙananan ayyukan da suke buƙatar mu yi, domin su babban tsari ne. Mu kuma muna son mayar da hankali sosai kan hulɗa da jama’a a matakin tushe, wato ƙananan hukumomi da mazabu.”
Shi ma Shugaban Kwamitin Amintattu na A4A, tsohon Gwamnan Jihar Kano, Sanata Ibrahim Shekarau, ya ce ƙungiyar, wadda ta taka rawa wajen neman zaɓen Tinubu a 2023, tana da niyyar sake yin irin wannan ƙoƙari a zaɓen 2027.
Shekarau ya bayyana cewa ƙungiyar ta gudanar da tarurruka da gwamnonin Arewa da sauran masu ruwa da tsaki domin musayar ra’ayi da tsara hanyoyin haɗin gwiwa da za su taimaka wajen cimma manufar sake zaɓen Shugaban Ƙasa.
Ya kuma ce A4A ta kammala shirye-shiryen samar da cikakken sakatariya domin inganta ayyukanta da daidaita harkokin ƙungiyar.
A cewarsa, sakatariyar za ta ƙunshi ofisoshin daraktoci, yayin da masu kula da jihohi za su riƙa gabatar da rahotanni, nazarinsu da karɓar umarnin gudanar da ayyuka.
Shekarau ya kuma gayyaci Mataimakin Shugaban Ƙasa, Sanata Kashim Shettima, domin ya ƙaddamar da sabon ginin ofishin A4A a hukumance ranar Asabar, 17 ga Oktoba, 2027.
Daga cikin waɗanda suka halarci taron akwai tsoffin gwamnonin Jihar Filato, Cif Joshua Dariye da Sanata Simon Lalong; tsohon Gwamnan Taraba, Rev. Jolly Nyame; tsohon Gwamnan Kogi, Alhaji Yahaya Bello; tsohon Gwamnan Katsina, Barista Ibrahim Shehu Shema; tsohon Gwamnan Bauchi, Malam Isa Yuguda; Mai Bai wa Shugaban Ƙasa Shawara kan Manufofi da Tsare-tsare, Hajiya Hadiza Bala Usman; da Shugaban Hukumar Yaƙi da Sha da Fataucin Miyagun Ƙwayoyi ta Ƙasa (NDLEA), Birgediya Janar Buba Marwa mai ritaya.
Read also: Gov. Yusuf Attends 2026 SAN Swearing-In Ceremony at Supreme Court,
Haka kuma, taron ya samu halartar wasu manyan jami’an gwamnati, da mambobin Kwamitin Amintattu da sakatariyar ƙungiyar
Sabuwar Nigeria
