Shugaban Ƙasa Bola Ahmed Tinubu ya ce amfani da CNG wajen sufuri ya fara rage wa ’yan Najeriya kuɗin mota a wasu jihohi, inda ya bayyana cewa ƙarin jama’a za su fara ganin sauƙin kuɗin sufuri daga 1 ga Oktoba, 2026. Ya ce a Borno, motocin CNG da na lantarki na jigilar jama’a kan N50 zuwa N100, maimakon N300 zuwa N600 da ake biya a wasu motocin kasuwanci, yayin da a Kaduna motocin CNG guda 100 suka kwashe kusan fasinjoji miliyan 3.2 a shekarar farko, tare da ceton sama da N3.5 biliyan ga matafiya.
Tinubu ya ce a Oyo, motocin CNG na Pacesetter Transport sun sauke kuɗin mota daga Lagos zuwa Ibadan daga kusan N8,000 zuwa N3,200, yayin da a Adamawa aka rage wasu kuɗaɗen sufuri da kusan kashi 50 cikin 100. A Enugu, kuɗin mota daga Enugu zuwa Nsukka ya sauka daga N2,500 zuwa N1,500, sannan a Plateau motocin da gwamnati ke tallafawa suna jigilar kusan mutane 13,000 kullum kan N200, idan aka kwatanta da sama da N500 da ake biya a motocin kasuwanci.
Shugaban ya ce irin wannan sauƙin ya kuma bayyana a Abuja, inda haɗin gwiwar gwamnati da NURTW ya samar da rangwamen kashi 40 cikin 100 ga fasinjojin wasu hanyoyin da motocin da aka sauya zuwa CNG ke bi. Ya ce kuɗin mota daga Area 1 zuwa Gwagwalada ya ragu daga N1,500 zuwa N900, Nyanya daga N700 zuwa N420, yayin da Wuse ya sauka daga N400 zuwa N240. Ya ƙara da cewa a cikin shekaru uku, an sauya sama da motoci 120,000 zuwa CNG, tare da cibiyoyin sauya motoci sama da 400 da tashoshin CNG sama da 90 a faɗin ƙasar.
Tinubu ya buƙaci jihohi su ƙara kaimi wajen faɗaɗa shirin kafin 1 ga Oktoba, yana mai cewa Najeriya na da isasshen gas da za ta iya rage dogaro da farashin man fetur da dizal na duniya. Ya ce gwamnatinsa za ta ci gaba da tallafa wa faɗaɗa ababen more rayuwar CNG da sauya motoci, domin tabbatar da cewa tanadin da ake samu daga makamashi mai rahusa ya koma ga jama’a ta hanyar rage kuɗin sufuri.
Sabuwar Nigeria.