Shugaban Ƙasa Bola Ahmed Tinubu ya yi Allah-wadai da kisan fitaccen malamin addinin Musulunci, Sheikh Yahaya Ibrahim Masussuka, da abokinsa, Adamu Abubakar, a garin Dutsin-Ma da ke Jihar Katsina.
Kafar Sadarwar Sabuwar Nigeria ta ce Shugaban ƙasar ya kuma umarci rundunar ’yan sanda da sauran hukumomin tsaro da su gudanar da cikakken bincike kan lamarin tare da kamo waɗanda suka aikata kisan domin gurfanar da su a gaban shari’a.
Read also: PRESIDENT TINUBU CONDEMNS MURDER OF SHEIKH YAHAYA IBRAHIM MASUSSUKA, DIRECTS THOROUGH INVESTIGATION
A ranar Litinin da yamma ne wasu ’yan bindiga suka kashe malamin da abokinsa a wani harin kwanton-bauna da suka kai musu ta hanyar harbin bindiga daga cikin abin hawa.
Mai ba shugaban ƙasa shawara kan yaɗa labarai da dabaru, Bayo Onanuga, ne ya bayyana hakan cikin wata sanarwa, inda ya ce Shugaba Tinubu ya kaɗu matuƙa da samun labarin kisan.
Read also: Gov. Radda Leads Delegation on Condolence Visit to Family of Late Sheikh Masussuka
Sanarwar ta ruwaito shugaban ƙasar yana bayyana kisan a matsayin mummunan aiki da ya saɓa wa ƙa’idojin zaman lafiya da mutunta rayuwar ɗan Adam.
Tinubu ya miƙa saƙon ta’aziyyarsa ga iyalan waɗanda aka kashe, mabiyansu, da kuma gwamnatin Jihar Katsina da al’ummarta bisa wannan babban rashi.
Ya kuma umarci rundunar ’yan sanda da sauran hukumomin tsaro da su ƙara ƙaimi kan binciken da rundunar ’yan sandan Jihar Katsina ta fara, domin gano waɗanda suka aikata laifin, kama su tare da gurfanar da su a gaban shari’a.
Shugaban ƙasar ya yi addu’ar Allah Ya jiƙan waɗanda suka rasu, Ya kuma ba iyalansu da sauran waɗanda wannan rashi ya shafa haƙurin jurewa.