Daga Aliyu Samba
Hukumar Alhazai ta Ƙasa (NAHCON) ta yi gargaɗi ga maniyyatan Hajji da masu gudanar da aikin Hajji na kamfanoni da su yi watsi da duk wani buƙatar kuɗi da wasu mutane za su yi da sunan tabbatar musu da gurbi na musamman a aikin Hajjin shekarar 2027.
Read also: Emir of Zazzau Seeks Sustained Efficiency in Hajj Administration*
Kafar Sadarwar Sabuwar Nigeria ta ce a cikin wata sanarwa da hukumar ta fitar a Abuja, NAHCON ta ce rabon guraben Hajji yana gudana ne bisa tsarin da aka amince da shi, da kuma ƙa’idojin da hukumar ta gindaya wajen bayar da lasisin kamfanonin da ke shirya Hajji.
Hukumar ta ce wasu mutane Yan damfara da ke ikirarin cewa jami’ai ko wakilan NAHCON ne suna kiran kamfanonin shirya Hajji da maniyyata, suna neman kuɗaɗe da sunan tabbatar musu da guraben Hajji na musamman.
NAHCON ta bayyana cewa babu wani mutum, wakili, kamfanin shirya Hajji ko wata ƙungiya da aka ba izinin neman ko karɓar wani ƙarin kuɗi ko kuɗin gudanarwa daga maniyyata ko masu shirya Hajji da sunan tabbatar da gurbin Hajjin 2027.
Read also: 2027 Budget to Upgrade Agric Training Centre, Enrol 1,000 Youths — Governor Radda
Hukumar ta ce duk wanda ya tuntubi maniyyaci ko kamfanin shirya Hajji yana neman kuɗi da irin wannan alkawari, yana aikata zamba ne kuma ba shi da wani izini daga hukumar.
NAHCON ta buƙaci duk wanda aka yi wa irin wannan da ya kai rahoto ga ‘yan sanda ko wasu hukumomin da ke da alhakin yaƙi da laifuka.
Hukumar ta kuma shawarci maniyyatan da su biya kuɗaɗen da aka sanar a hukumance kawai, ta hannun Hukumomin Jin Daɗin Alhazai na Jihohi, bankunan da aka amince da su a ƙarƙashin tsarin adashin Gata,wato Hajj Savings Scheme, ko kuma kamfanonin shirya Hajji da ke da ingantaccen lasisi.
Read also: Independence Day: Gov. Yusuf Urges Kano Residents to Shun Violence Ahead of 2027 Elections
NAHCON ta tunatar da maniyyata cewa rashin kammala shigar da bayanan maniyyata kafin ranar 26 ga Satumba 2026, da kuma rashin kammala tura kuɗaɗen Hajji zuwa ranar 2 ga Disamba 2026, na iya haifar da rasa guraben da aka ware, ba tare da la’akari da duk wani alkawari da mutanen da ba su da izini suka yi ba.
Hukumar ta ce tana da ƙudurin tabbatar da gudanar da aikin Hajjin 2027 cikin gaskiya, adalci da tsari, tare da kira ga jama’a da su dogara da bayanan da hukumar ke fitarwa ta kafafen sadarwarta na hukuma kawai.