Rundunar ’yan sandan Jihar Kaduna ta ce ta kubutar da mutane 75 da aka yi garkuwa da su a Karamar Hukumar Birnin Gwari ta jihar.
Kafar Sadarwar Sabuwar Nigeria ta ruwaito rundunar tana cewa wadanda aka kubutar sun hada da maza, mata da yara, wadanda wasu ’yan bindiga dauke da bindigogin AK-47 da sauran muggan makamai suka yi garkuwa da su a kauyen Folwaya da ke kusa da Birnin Gwari a ranar 19 ga Agusta, 2026.
Jami’in hulda da jama’a na rundunar, DSP Mansir Hassan, ya ce rundunar ta samu sahihin bayanin lamarin ne daga reshen kungiyar direbobin NURTW na Birnin Gwari da misalin karfe 5:30 na yamma. Ya ce nan take aka tura wata tawagar jami’an ’yan sanda zuwa yankin.
A cewar rundunar, ’yan bindigar sun tsere zuwa cikin daji bayan da suka hango jami’an ’yan sandan dauke da makamai, inda suka bar mutanen da suka yi garkuwa da su a wani kogo da ke cikin tsaunuka. Dukkan wadanda aka kubutar an same su cikin koshin lafiya.
Kwamishinan ’yan sandan jihar Kaduna, CP Rabiu Muhammad, ya yaba wa reshen NURTW na Birnin Gwari bisa sanar da jami’an tsaro lamarin cikin gaggawa, tare da yabawa jami’an yankin kan daukar matakin gaggawa da kwarewa.
Ya kuma bukaci jama’a da su ci gaba da sanya ido tare da kai rahoton duk wani abin da ake zargi ga ’yan sanda, yana mai gargadin kada jama’a su dauki doka a hannunsu. Rundunar ta tabbatar da cewa za ta ci gaba da kokarin kare rayuka da dukiyoyin al’ummar jihar.