Daga Aliyu Samba
Shugaban Najeriya, Bola Ahmed Tinubu, ya umarci mai ba shi shawara na musamman kan tsaron cikin gida, Manjo Janar Adeyinka A. Famadewa, da ya jagoranci aikin samar da cikakken rahoton barazanar tsaro da kuma shirin ayyukan tsaro na shekaru biyar.
Kafar Sadarwar Sabuwar Nigeria ta ce Shugaban ya bayar da umarnin ne domin kara inganta hadin gwiwa tsakanin hukumomin tsaro, da na leken asiri da kuma rundunonin sojin kasar.
Tinubu ya kafa kwamiti mai mambobi 11 domin shirya shirin, wanda ya hada da mai bai wa shugaban kasa shawara kan harkokin tsaro, Malam Nuhu Ribadu; Ministan Tsaro, Janar Christopher Musa; da Karamin Ministan Tsaro, Bello Muhammad Matawalle. Sauran mambobin sun hada da Shugaban Hafsan Tsaro, Janar Olufemi Oluyede; Shugaban Sojin Kasa, Laftanar Janar Waidi Shaibu; Shugaban Sojin Sama, Air Marshal Sunday Kelvin Aneke; da Shugaban Sojin Ruwa, Vice Admiral Idi Abbas.
Daraktocin DSS, Tosin Ajayi, da Hukumar Leken Asiri ta Kasa, Ambasada Muhammed Muhammed, na cikin kwamitin.
Shugaban ya bayar da umarnin ne a taron Majalisar Zartarwa ta Tarayya da aka gudanar ranar Laraba a Fadar Shugaban Kasa da ke Abuja, inda ya ce ana bukatar tsari guda daya da zai bai wa hukumomin tsaro damar tunkarar sauye-sauyen barazanar tsaro da ke fuskantar kasar.
Shugaban ya ce rahoton Tantance Manyan Barazanar Tsaron Ƙasa (National Threat Assessment) zai gano manyan barazanar da ke fuskantar Najeriya, tare da tantance su da kuma tsara manufofin tunkarar su
Ya ce shirin Tsarin Dabarun Ayyukan Tsaron Ƙasa (Strategic Defence Operations Plan) kuma zai fayyace abubuwan da ya kamata a bai wa fifiko, irin rundunonin da ake bukata a wurare daban-daban, gibin kayan aiki da sauran bukatun soji, da kuma lokacin aiwatar da shirin.
Tinubu ya umarci kwamitin da ya fara aiki nan take tare da kammala rahoton barazanar tsaro da shirin ayyukan tsaro na shekaru biyar cikin kwanaki 90 domin gabatar da su gare shi. Ya ce bayan amincewa, shirin zai zama babban tsarin da za a yi amfani da shi wajen tsara ayyukan soji da tsaro na wani lokaci, da kuma kafa tsarin kashe kudaden tsaro da sayen kayan aikin soja na shekaru masu zuwa.